Gyan ka deepak, jalana hai…

Gyan ka deepak, jalana hai…

6_Boy_studying

 

Andhakaar ye, kaisa hai

Jo beet na raha, waqt k saath.

Jaag nahi raha, insaan jaha

Suraj ki kirano, k saath.

Is raat pe vijay pataka, phehrana hai

Gyan ka deepak, jalana hai…

 

Jal raha bachpan jaha,

Majduri karne me.

Do waqt ki roti k liye,

Til til jalne me.

Munni jaha logo k ghar, jhuthe bartan dhoti hai,

Aur Chhotu jaha aaj bhi, kisi ko chai pilata hai.

Aise kai munni aur chhotu hai,

Jinko ek nayi subah, dikhana hai.

Gyan ka deepak, jalana hai…

 

Naam to uska, pata bhi nahi

Jo gandgi se, khana chun raha hai.

Aur wo jo, haath failaye

2 paiso ki raah, dekh raha hai.

Us zindgi se nikaal, bahar unko

Nayi zindgi se, pehchaan karana hai.

Gyan ka Deepak jalana hai…

 

Puchha maine unse,

K padhne jaoge?

Ek sawal uska tha phir,

“Kya tum mere parivaar ka, pet bhar paoge?

Chhotu mai banta nahi, banaya jata hun,

Auro k sang padhne jana chhod, do waqt ka khana kamata hun.

Padhai mera ghar, paal nahi sakta,

Aur apne ghar k jarurato ko , mai taal nahi sakta. “

Is jawab ko sun, mai aur kuch na keh saka,

Ulajh gaya uske, sawalo me

Aur phir sulajh, na saka

Chhotu k sawalo ka jawab bhi, dhund k lana hai

Gyan ka deepak jalana hai…

 

60 saal ka aazaad, bharat

Aur aaj bhi hum, agyanta k gulaam hai,

Jooo de rahe hum, aane wale kal ko,

Ye kaisa paigaam hai?

Kal bhi jaha ghar me, 5-10 bachche honge,

Khane ko kuch nahi, par pine me kharche honge.

Ladkiyaan jaha kal bhi, baal vivah ka shikaar banegi,

kam umar me maa ban, Kya swasth samaaj ka nirmaan karengi?

Chori loot ki vaardaat, aur badhta jayega

Ek tabka samaaj ka uthega, aur dusra gareeb , aur gareeb hota jayenga.

Samanta na ho jaha, waha sab saath kaise rahenge?

Gyaan k bina, khud k pairo pe kaise challenge?

Is liye, sabse pehle agyanta k apraadh ko, jad se mitana hai.

Gyan ka deepak jalana hai…

 

Ho gaye, sawal bahut

Ab khud jawab, dena hai

Bhale de naa sake, aur kuch inhe,

Par apna dhyan, thoda dena hai.

Jaha le, zimmedari hum

Ek masum ko, padhane ka.

Pura mashaal, na sahi

Ek chhota deepak, jalane ka.

Har ek ki, ye pehal

Ek masum ko, muskaan dega

Gumnaami k, andhero se dur

Use ek nayi, pechaan dega.

Is koshish se, ek sabhya bharat banana hai

Wo bharat, jo mera bhi hai aur tera bhi

Ise ek nayi pechaan, dilana hai

Gyan ka deepak, jalana hai…

Ab bhi aankho me, nami baki hai…

Ab bhi aankho me, nami baki hai…

142769263

Ab bhi aankho me, nami baki hai

Un haseen palo me , zindgi abhi baki hai

Basein hai khwab, aankho ki talhati me,

Sapno me hakikat ka, zama abhi baki hai…

 

Badalte palo me, badalte rishte dekha hai,

Un rishto me, aansuo ka safar dekha hai.

Paya hai khud ko, bheed ka ek hissa,

Us hisse me humsafar ka, kissa abhi baki hai…

Ab bhi aankho me, nami baki hai…

 

Khud ko tanhai se, aisa lipta paya hai,

Jaise oos ki bundo pe, thand ka saya hai.

Paya hai phoolo me, parag ka kesar,

Par khud me khud ko, pana abhi baki hai…

 

Ab bhi aankho me nami baki hai…

Un haseen palo me, zindgi abhi baki hai…

Umeed ye tutne na dena…

Umeed ye, tutne na dena…

sunset-boat-saga-sabin

 

Ek kagaz ki kasti pe, Umeed ka sahara hai

Laherain hai badi, aur door kinara hai

Umeed ye, tutne na dena

Apne hauslo ko, yun chhutne na dena

Pakad hatheli se patwar

Zindgi ki kashti ko, bhatakne na dena

Umeed ye, tutne na dena…

 

Ho sakta hai k, tum thak jao

Thak k, ruk jao

Par ruk k bhi, khud ko sone na dena

So k manzil ko, sapno me khone na dena

Uth phir se, is baar  zam k garajna

Haar ka sir, phir uthne na dena

Umeed ye tutne na dena…

 

Koshish karna har baar, k ek koshish kar sako

Umeed ka diya jala, kuch roshni kar sako

Andhero k aandhi me, ye roshni bujhne na dena

Darr ko bhi apne, darr ka ehsaas hone na dena

Pana khud ko is tarah, k phir khud ko khone na dena

Umeed ye tutne na dena…

 

Pakad hatheli se patwar

Zindgi ki kashti ko, bhatakne na dena

Umeed ye, tutne na dena…

Kabhi…shaam ki baahon me baith, zindgi ki subah aur raat socha karte,

Kabhi…shaam ki baahon me baith, zindgi ki subah aur raat socha karte,

Waqt k thode piche jaa, suraj k ugne se dubne ka safar dekha karte.

Par, waqt k dayaro se bahar…ye shaam bhi naa tha,

Aur waqt se bekhabar….hum kaha the, ye malum na tha.

Bas kisi shaam yun hi baithe, zindgi ki subah aur raat socha karte…

Waqt k thode piche jaa……..

 

Jab kabhi wo shaam mujh se milti , mil leta khud se do pal k liye,

Maaf karta dusro ko, aur saza khud ko… zindgi bhar k liye.

Us lamhe…tanha khud ko kabhi adhura, kabhi pura pata,

Apne wajud se ru-b-ru ho, khud me thoda ulajh jata.

Haan…jab kabhi wo shaam milti, zindgi ki subah aur raat socha karte…

Waqt k thode piche jaa………..

 

Wo shaam……apni baahon me, kabhi yaado ko thand ki chadar me chhupa lati,

Kabhi… yaado ko kale badal bana, in aankho se barasa jati.

Kabhi aisa bhi hota k…. muskaan hoto pe rakh, palko se jazbaat chhlaka jati,

Aur kabhi…gumsum sa chhod mujhe, khud bhi dabe paun nikal jati.

Wo shaam…jaha kabhi zindgi ki subah aur raat socha karte…

Waqt k thode piche jaa….

 

Jab bhi us shaam se bahar aate, khud ko khud se thoda alag pate,

Chalte sang apni parchhai k, par phir bhi usme khud ko dekh na pate.

Bas samet lete… khud ki saari galtiyo ko, ek lambi saans k saath

Aur…. bas chal padte, khud me khud k bhaar k saath

Yun hi kabhi shaam ki bahon me baith, khud ko apni baahon me sameta karte…

Waqt k thoda piche jaa, suraj k ugne se dubne ka safar dekha karte…

 

 

 

Hindi poems, Love, Devotion, Faith, Hope

Follow

Get every new post delivered to your Inbox.